Barlyq ýaqytta qolónershiler men jumysshylar kez-kelgen el ekonomıkasynyń negizgi qozǵaýshy kúshi boldy. Bizdiń aınalamyzda jasalǵan barlyq zattar qolónershilerdiń jumys qolymen jasalǵan. Álem bir orynda turmaıdy, búgin biz eńbek adamy arqyly iske asyrylǵan ınjenerlik oıdan týyndaǵan ǵajaıyptardy kórip otyrmyz. Ónimder damydy, qyzmetterdiń sapasy jaqsardy. Bizdiń oıymyzsha, progres sebepteriniń biri – básekelestik rýh, ol árbir sheberge óz ónimin básekelesine qaraǵanda sapaly jasaýǵa shabyt beredi.
2015 jyly Qazaqstan halyqaralyq WorldSkills qozǵalysyna qosyldy. World Skills-jumysshy mamandyǵyn alyp jatqan stýdentter arasyndaǵy sheberlik saıysy. Jyl saıyn júzdegen jas dánekerleýshiler, aspazshylar, kondıterler, zergerler, dızaınerler, baǵdarlamashylar, slesirlar jáne t.b. elde úzdik bolý jáne álemdik chempıonatta respýblıkany tanystyrý quqyǵy úshin kúresedi.
Stýdent – konkýrsanttardy sapaly daıyndaý úshin tálimgerler halyqaralyq kásiptik standarttardy, úzdik álemdik tájirıbelerdi zerdeleıdi, oqý oryndarynyń materıaldyq-tehnıkalyq bazasy jetildiriledi. Munyń bári úlken shyǵyndardy talap etedi, biraq eger qarajat bizdiń jastarymyzdyń bilim alýyna jumsalatynyn eskeretin bolsaq, bul adamı kapıtaldy damytýǵa laıyqty ınvestısıa dep aıtýǵa bolady. Shynynda da, World Skills-tiń bul qozǵalysy TjKB júıesin damytýǵa jaqsy serpin boldy (tehnıkalyq jáne kásiptik bilim).
Kolejderdiń materıaldyq-tehnıkalyq bazalaryn nyǵaıtý úshin memleket “Jas Maman” baǵdarlamasyn iske qosty, ol boıynsha Qazaqstannyń 180 kolejine zamanaýı oqý-zerthanalyq jáne óndiristik jabdyqtar satyp alýǵa qarajat bólindi. Bul kolejderge jumysshy kadrlardy sapaly daıarlaýǵa múmkindik beredi.
World Skills talaptary boıynsha demonstrasıalyq emtıhan úzdik álemdik praktıkalardy paıdalana otyryp, qorytyndy jáne aralyq atestattaý sheńberinde túlekterdi baǵalaý ádisteriniń biri bolyp tabylady. Basqasha aıtqanda, bul World Skills konkýrs talaptaryna saı tájirıbelik emtıhan. Emtıhan sátti aıaqtalǵannan keıin stýdent Skills tólqujatyn alady. Bul qujatta pánder men baǵalardyń ornyna quzirettilikter men olardyń upaılary kórsetilgen, al quzirettilikter Soft Skills-ti (mamandandyrylmaǵan, mansap úshin mańyzdy kásibı emes daǵdylar jıyntyǵy, olar jumys prosesine sátti qatysýǵa , joǵary ónimdilikke jaýap beredi jáne ótpeli bolyp tabylady, ıaǵnı belgili bir pándik salamen baılanysty emes) jáne Hard Skills (úıretýge bolatyn jáne ólsheýge bolatyn kásibı daǵdylar) daǵdylarymen sıpattalady.
Semeı qalasynyń Radıotehnıka jáne baılanys kolejinde(https://mykris.edu.kz) stýdentter “Baılanys montajshy-kabelshi” biliktiligi boıynsha demonstrasıalyq emtıhan tapsyrýǵa daıyndalýda.
Jalpy úsh emtıhan kúninde stýdentter optıkalyq jáne mys kabelmen jumys isteý, jelilik jabdyqty montajdaý jáne aqyldy úı elementterin salý daǵdylaryn kórsetedi.
Emtıhan suraqtary men tapsyrmalary ISO11801 halyqaralyq salalyq standarty boıynsha qurylǵan. Emtıhandardy sátti ótkizý úshin zamanaýı ólsheý jáne dáldigi joǵary jabdyqtar qoldanylady: kabeldik tester FLUKE DSX-8000-ADD; Fujikura 86S KIT A.
Joǵaryda atap ótilgen emtıhandy sátti tapsyrǵan stýdentterge beriletin Skills tólqujatynyń quzirettilikteri mynadaı:
1. Jumystardy uıymdastyrý;
2. Kommýnıkatıvtik daǵdylar;
3. Josparlaý jáne jobalaý;
4. Kabeldi montajdaý;
5. Talshyqty-optıkalyq qurylymdalǵan kabeldik júıeler;
6. Qurylymdyq kabeldik júıeler;
7. «Aqyldy úı” tehnologıalary;
8. Aqaýlyqtardy izdeý jáne joıý;
9. Ólsheý.
Bolashaqta bul tólqujat tek bizdiń elimizdiń aýmaǵynda ǵana emes, sonymen qatar Word Skills halyqaralyq qozǵalysynyń qatysýshylary bolyp tabylatyn álem elderinde de túlektiń biliktiligin rastaıtyn mańyzdy qujat bolýǵa quqyly dep sanaımyz.
Kolej saıty: http://mykris.edu.kz
Avtorlar:
Dırektordyń oqý-tájirıbe jumysy boıynsha orynbasary Shaıdollın Maksat Kaırbekovıch
Dırektordyń oqý-isi boıynsha orynbasary Kýmasheva Shamshıa Kaırbekovna
Kolej ádiskeri Kaıyrjanova Erkejan Erjanovna
